8

വിവാഹം മിക്കവരുടേയും ജീവിതത്തിലെ ഒരു സ്പെഷൽ ഡേ ആയിരിക്കും. അതിന്‍റെ ആഘോഷമെന്നവണ്ണം ആർഭാട വിവാഹങ്ങൾ ഇന്നു സർവസാധാരണമായിരിക്കുന്നു. എന്നാൽ വിവാഹം കഴിഞ്ഞ് ഒരുമിച്ച് താമസിച്ചു തുടങ്ങിയതിനു ശേഷം വർധിച്ചു വരുന്ന ആത്മഹത്യകളും കൊലപാതകങ്ങളും പീഡനങ്ങളും ആശങ്കയുളവാക്കുന്നതാണ്.

അടുത്തിടെ വലിയ ചർച്ചയായ ട്വിഷ ശർമയുടേയും ദീപികാ നഗറിന്‍റെയും ദുരൂഹമരണങ്ങൾ, നല്ല വിദ്യാഭ്യാസവും ജോലിയുമുള്ള പെൺകുട്ടികൾക്കു പോലും ഭർതൃ കുടുംബങ്ങളുടെ പീഡനത്തിൽനിന്നു രക്ഷപ്പെടാനാവുന്നില്ലെന്നു ചൂണ്ടിക്കാണിക്കുന്നു. മകൾ വിവാഹജീവിതത്തിൽ പീഡിപ്പിക്കപ്പെട്ടിട്ടും തങ്ങൾ ‘അഡ്ജസ്റ്റ്’ ചെയ്യാൻ പറഞ്ഞെന്നു പരിതപിക്കുന്ന കുടുംബങ്ങൾ, ഇന്നും സമൂഹം സ്ത്രീകളുടെ സഹനത്തെ മഹത്വവൽക്കരിക്കുകയും വിവാഹമോചനത്തെ അപരാധമായി കാണുകയും ചെയ്യുന്നുണ്ട് എന്നതിന്‍റെ ഉദാഹരണമാണ്. അതുകൊണ്ടൊക്കെയാവാം, പുതിയ തലമുറയിലെ പെൺകുട്ടികളിൽ വലിയൊരു ശതമാനം വിവാഹം കഴിക്കാൻ താത്പര്യപ്പെടുന്നില്ലെന്ന് പഠനങ്ങൾ!

വിവാഹത്തിൽ സ്ത്രീകൾ മാത്രമാണോ ഇരകൾ? അടുത്തിടെ, നടൻ ജയം രവി, താൻ സമ്പാദിക്കുന്ന പണം തനിക്ക് ഉപയോഗിക്കാൻ പോലും അനുവാദം വാങ്ങണമെന്ന്, താൻ ചെലവ് നോക്കുന്ന തന്‍റെ കുഞ്ഞുങ്ങളെ തനിക്ക് കാണാനോ സംസാരിക്കാനോ അനുവാദമില്ലെന്ന് ഒച്ചയുയർത്തിയും തൊണ്ട ഇടറിയും സംസാരിക്കുന്നതിനു താഴെ കമന്‍റ് ബോക്സുകളിൽ സമാനമായ അനുഭവങ്ങൾ വിവരിക്കുന്ന നിരവധി പുരുഷന്മാരെ കാണാം. ഇത്തരം വൈകാരിക, സാമ്പത്തിക ചൂഷണങ്ങളും പീഡനങ്ങളാണ്.
വിവാഹം എന്തിനാണ്? എന്തുകൊണ്ടാണത് നിരവധി പേർക്ക് ഊരാക്കുടുക്കും പേടിസ്വപ്നവും കൊലക്കയറുമാകുന്നത്?

ഹാപ്പി വെഡ്‌ഡിംഗ്!

നിങ്ങൾ എപ്പോൾ, എങ്ങനൊരാളെ വിവാഹം കഴിക്കണമെന്ന് ചുറ്റുമുള്ളവർ തീരുമാനിക്കുകയും നിർബന്ധിക്കുകയും ചെയ്യുന്നതായി കാണാം. ‘വിവാഹം കഴിക്കാൻ താത്പര്യമുണ്ടോ?’ എന്നൊരു ചോദ്യം പോലും അവിടെ ഉണ്ടാകുന്നില്ല.
പെൺകുട്ടിക്ക് പതിനെട്ടു വയസ് തികയാൻ ക്ഷമയില്ലാത്തത് കൊണ്ട് പതിനേഴേ മുക്കാലിനേ വിവാഹം നടത്തിയത്, പ്ലസ് ടുവിനു പഠിക്കുന്ന ‘ഭാര്യ’ വീട്ടുപണി കാരണം സ്‌കൂളിൽ പോകാനാകാത്ത വിഷമത്തിൽ ആത്മഹത്യ ചെയ്തത് ഒക്കെ കേരളത്തിലാണ്‌! ഈ 2026 ലാണ്‌!! കടം കയറിയും സാമ്പത്തിക ബാധ്യത വന്നും നിരവധി ‘കുടുംബനാഥൻ’മാർ ജീവിതം സ്വയം അവസാനിപ്പിക്കുന്നതും, ഗാർഹിക പീഡനങ്ങളിൽ ഭാര്യ പരലോകത്തേക്കും ഭർത്താവ് ജയിലിലേക്കും പിരിഞ്ഞു പോകുന്നതും എത്രയൊക്കെ ചുറ്റും കണ്ടാലും പിന്നെയും വീടു വിറ്റും കടം വാങ്ങിയും ആർഭാടമായി മകളെ കെട്ടിച്ചു വിട്ട് നമ്മൾ ഒരു ഭാരമൊഴിഞ്ഞല്ലോ എന്ന് ആശ്വസിക്കുന്നു. ഉണ്ടായ ‘നഷ്ടം’ മകനൊരു വിവാഹം കഴിക്കുമ്പോൾ അവന്‍റെ ഭാര്യയിൽനിന്നു നികത്താമെന്നു കണക്കു കൂട്ടുന്നു. ഈ ബാർട്ടർ സിസ്റ്റമാണോ പരിശുദ്ധമെന്നു നമ്മൾ പറയുന്ന വിവാഹം?
ആണെങ്കിൽ, കാലാനുസൃതമായി അത് മാറേണ്ടതുണ്ട്. ആരോഗ്യമുള്ള ഒരു വിവാഹബന്ധത്തിന് പ്രസക്തമായി എനിക്ക് തോന്നിയ ചില കാര്യങ്ങൾ പങ്കു വയ്ക്കട്ടെ.

റൈറ്റ് പേഴ്‌സൺ അറ്റ് റൈറ്റ് ടൈം

തനിക്കു ചേരുന്നൊരാളെ കണ്ടെത്തുന്നത് രണ്ടു പേർക്കും അനുയോജ്യമായ സമയത്തു കൂടിയായിരിക്കണം. പലർക്കും ഭാവിയെ കുറിച്ച് കൃത്യമായി ഒരു ധാരണ ഉണ്ടാവുക ജോലി കിട്ടി സെറ്റിൽ ആകുമ്പോഴാവും. ഒപ്പം, ഫിനാൻഷലി ഇൻഡിപെൻഡന്‍റ് ആകുന്നത് സുരക്ഷിതത്വ ബോധവും നൽകും. അതിനു മുൻപേയുള്ള വിവാഹങ്ങൾ അനിശ്ചിതത്വവും സാമ്പത്തിക പ്രതിസന്ധികളും പ്രതീക്ഷിക്കാതെയുള്ള ബുദ്ധിമുട്ടുകളും കൊണ്ട് ബന്ധത്തിന്‍റെ സ്വരച്ചേർച്ചയെ ബാധിക്കാൻ സാധ്യതയുണ്ട്. ഒരുമിച്ചു പോകാൻ ഒരാൾ മാത്രം മറ്റൊരാൾക്ക് വേണ്ടി എല്ലാം അഡ്ജസ്റ്റ് ചെയ്യുന്നതും ഭാവിയിൽ പ്രശ്നങ്ങളും അകൽച്ചയും ഉണ്ടാക്കാം.

ചിന്താഗതിയും മൂല്യങ്ങളും ശീലങ്ങളും

വിവാഹത്തിന്‍റെ പൊരുത്തത്തിൽ കോമൺ ഇന്‍ററസ്റ്റ് പോലെ തന്നെ പ്രധാനമാണ് ഒരേ വാല്യൂ സിസ്റ്റവും ചിന്താഗതിയും ശീലങ്ങളും. നമ്മുടെ താത്പര്യങ്ങൾ കാലക്രമേണ മാറും. പക്ഷേ ചിന്താഗതിയും മൂല്യങ്ങളും ശീലങ്ങളും അടിസ്ഥാനമാണ്. അതിലെ യോജിപ്പില്ലായ്മ ദൈനംദിന ജീവിതത്തിലെ ഓരോ ചെറിയ കാര്യത്തിലും കോൺഫ്ലിക്ട് ഉണ്ടാക്കും. പണം ചെലവഴിക്കുന്ന കാര്യങ്ങൾ മുതൽ ശരീര ശുചിത്വം വരെ, പേരന്‍റിംഗ് സ്റ്റൈൽ മുതൽ ഒരു വാർത്തയോടു പ്രതികരിക്കുന്ന രീതി വരെ വലിയ വഴക്കുകൾക്കു കാരണമായേക്കാം.

സൗഹൃദം എന്ന അടിത്തറ

പ്രണയവിവാഹമാണെങ്കിലും അറേഞ്ചജ് മാരേജ് ആണെങ്കിലും പങ്കാളികളാകുന്നവർ തമ്മിലുള്ള സൗഹൃദം വിവാഹജീവിതത്തിൽ പ്രധാനമാണ്. പ്രണയച്ചൂട് നഷ്ടപ്പെട്ടാലും ഇല്ലെങ്കിലും, പങ്കാളികളെ ഒരുമിച്ച് ജീവിതത്തെ അഭിമുഖീകരിക്കാനും സന്തോഷത്തിലും സങ്കടത്തിലും താങ്ങായി നിൽക്കാനും സഹായിക്കുന്നതു സൗഹൃദത്തിന്‍റെ ഊഷ്മളതയാണ്. ഒരുമിച്ച് ഒരു കുടുംബം കെട്ടിപ്പടുക്കുന്നത്, രണ്ടു നല്ല സുഹൃത്തുക്കൾ തുല്യമായി എഫേർട്ട് ഇട്ടു ചെയ്യുന്ന ഒരു പ്രോജക്ട് പോലെയാണെങ്കിൽ ആ പ്രോസസ് തന്നെ അവരെ ഒരുപാട് അടുപ്പിക്കും. അവർക്കിടയിൽ ടീം സ്പിരിറ്റ് ഉണ്ടാക്കിയെടുക്കും.

ഒരുമിച്ച് വളരുക

പ്രായപൂർത്തിയായ രണ്ടു വ്യക്തികൾ ഇണയായി ഒരുമിച്ച് ജീവിക്കാൻ തീരുമാനിക്കുമ്പോൾ അതിലൊരാളുടെ സ്വത്വമോ വ്യക്തിത്വമോ മറ്റൊരാൾക്കായി പണയം വയ്ക്കേണ്ടതില്ല. പകരം, രണ്ടുപേർക്കും ഒരുമിച്ച് വളരാനുള്ള ഒരവസരമായി ആ കൂട്ടിനെ കാണാം. സ്നേഹത്തിനൊപ്പം ഉത്തരവാദിത്തങ്ങളും ഒരുമിച്ചു പങ്കിടാം. മറ്റൊരാളെ വളരാനനുവദിക്കാതെ നിയന്ത്രിക്കുമ്പോൾ പരസ്പര സ്നേഹവും ബഹുമാനവും ഇല്ലാതെയാകുന്നു. കുടുംബത്തിന്‍റെ മൊത്തം സന്തോഷത്തെയും ആരോഗ്യത്തെയും അതു ബാധിക്കും.

പ്രതിസന്ധികളിലും ബഹുമാനം നിലനിർത്തുക

പങ്കാളികൾക്കിടയിൽ കടുത്ത ഭിന്നത ഉടലെടുക്കുകയാണെങ്കിൽ അത് പരസ്പരം പരിഹരിക്കാനാകുന്നില്ലെങ്കിൽ പ്രഫഷണൽ ഹെൽപ് സ്വീകരിക്കേണ്ടതാണ്. പരസ്പരം ചെളിവാരി എറിയാതെ ബഹുമാനം നിലനിർത്തിക്കൊണ്ട് ഭിന്നതകളെ വിശകലനം ചെയ്യുക. മറ്റൊരു കുടുംബാംഗമോ സുഹൃത്തുക്കളോ മധ്യസ്ഥതയ്ക്കു വരുമ്പോൾ അവരുടെ അഭിപ്രായങ്ങൾ ബയസ്ട് ആകാൻ സാധ്യതയുണ്ട്. എന്നാൽ, നിങ്ങൾ പീഡനം നേരിടുകയാണെങ്കിൽ, അത് ആവർത്തിച്ചു കൊണ്ടേയിരിക്കാൻ സാധ്യതയുള്ളതിനാൽ, അതിനെ കൃത്യമായി അഡ്രസ് ചെയ്യുക.

ഹാപ്പി വെഡിംഗല്ല, ഹാപ്പി മാര്യേജ് ആവണം നമ്മുടെ ഉദ്ദേശ്യം.